Frédéric MISTRAL, ode à Jasmin le 12 mai 1870

Ode de Frédéric Mistral, en hommage à Jasmin le 12 mai 1870 

Per la nacioun, e per li fraire
Que rèston a l’oustau e que menon l’araire
E parlon voulountous la lengo dóu terraire
Es un triounfle aqueste jour
Vaqui perqué, ieu de Prouvènço
Vene di Prouvençau paga la redevènço
Au gran troubaire dóu Miejour
Et tout d’abord a la Gascougno
Que fasènt soun devé sens crento ni vergougno
Mantén sa vièio lengo e per elo temougno
Salut emè li bras dubert !
Maugrat lou flot que vèn la batre,
Dóu brès de Jaussemin au païs d’Enri Quatre
Vosto noublesso noun se perd
O ! gramaci, raço valènto !
Blesi, despersouna pèr la toueso insoulènto
De Paris, e nega dins la foulo doulènto
Vous cridavian : Ajudas-nous !
E de Bourdèus fins qu’a Marsiho
Agen nous a larga tau flum de pouësio
Que n’en sian tóuti luminous
Cantant l’amour miéls qu’uno femo
E boulegant dóu cor li plus dous terro-tremo
Avèn vist Jaussemin nous tira li lagremo
Mai l’amavian, sabès perqué ?
Coume Pindare de sa Tèbo,
Eu nos parlavo, fièr, d’Agen, de Bilo-Nèbo,
D’Auch, dóu maine d’Estanquet
Ardènt, lusènt e poupulàri,
Demandant soulamen la glóri per salàri
Disié Mous Soubenis, Lous Frais bessous, Alari
L’Abuglo de Castèl-Culié
E pietadouzo vo risènto,
Sa voues, dins Françouneto o Maltro l’Inoucènto
Fasié di cor çò que voulié
Pièi, se quauque marchand d’endormo
Ié venié per coumplaire à la modo uniformo :
« Pouèto, à l’ouro d’uei ta noto es descounformo ;
« Pouèto gascounes pas mai !
« Es lou Prougrès que lou coumando… »
« La pitchouno patrio es bièn abans la grando,
Respoudié, Francimand ? jamai !
E’n pelerin de Coumpoustello
Anavo degrunant soun capelet d’estello
Pèr li paure e pèr Diéu dounant a canestello
E lou païs reviscoula
Bevié l’ounour à soun calice ;
E París, e lou rèi, e tôuti, pèr delice
Voulien ausi noste parla
Dis àuti cimo que soun vostro
Dóu front di Pirenèu, tout ço que l’ieu nous mostro
Catalan o Gascoun, entènd la lengo nostro :
E bèn ! D’amount à plen camin
Iéu vese un pople brun se móure
E di viéu e di mort, li courouno van plôure
Sus lou brounze de Jaussemin
Car nôsti mort, e nôsti paire,
E nôsti dre sacra de pople e de troubaire
Que trepejavo, aièr, lou pèd de l’usurpaire
E que bramavon ôutraja,
Revivon ara dins la glôri !
Aro, entre si dos mar, la lengo d’O fai flôri
O Jaussemin, nous a venja !

La pitchouno patrio es bièn abans la grando, Respoudié, Francimand ? jamai !